Natingala ang mga arkeyologist human nasayran ang usa ka talagsaong arkeolohikal nga nadiskubre sa duol sa Changsha, China niadtong 1968 sa dihang ang mga trabahante nga nagkalot alang sa usa ka air-raid shelter nakatagbo sa usa ka dako nga lubnganan.
Didto ilang nakit-an ang lawas ni Xin Zhui, usa ka halangdong babaye nga gituohang namatay niadtong mga 168 BC, apan katingalahan nga nagpabiling halos kompleto ang iyang lawas bisan milabay na ang kapin 2,000 ka tuig.
Sumala sa mga eksperto, ang iyang panit nagpabiling mamasaon ug elastiko, ang iyang mga bukton ug bitiis mahimo pa nga matikuko, ug ang iyang mga ugat sa dugo ug mga internal nga organo halos wala madaot. Ingon sa mga tigdukiduki, ang maong kahimtang sa lawas daw sama ra sa usa ka tawo nga bag-o lang namatay.
Gituohan nga ang maong talagsaong pagkapreserba sa lawas tungod sa hugot nga pagkasilyo sa iyang lungon nga adunay usa ka misteryosong asidikong likido nga nakapugong sa pagkadunot sa iyang lawas sulod sa milenyo.
Gawas sa iyang lawas, kapin 1,400 ka mga butang usab ang nakit-an sulod sa lubnganan, lakip ang mga sapot nga hinimo sa seda, mga lacquerware, ug karaang mga sinulat.
Hangtod karon, gikonsiderar si Xin Zhui isip usa sa labing maayo nga napreserbang karaang lawas sa tawo nga nahibal-an sa kasaysayan, nga nagpadayon sa paghatag og bililhong kasayuran bahin sa karaang sibilisasyon sa China.
Photo Courtesy: Wikipedia
