Literal nga “One Big Happy Family” ang panghitabo sa istorya niining usa ka 86 anyos nga lalaki sa Tanzania usa ka nasud nga nahimutang sa East Africa, ang nakapukaw sa atensyon sa daghang tawo human nahibal-an nga adunay siyay 16 ka asawa, 104 ka anak, ug 144 ka apo.
Ang lalaki mao si Mzee Ernesto Muinuchi Kapinga, nga nagpuyo sa usa ka baryo sa Njombe, Tanzania. Matud pa kaniya, ang ilang dako nga pamilya adunay kaugalingong sistema diin ang matag miyembro adunay tahas ug responsibilidad aron magpabiling organisado ang ilang panimalay.
Sumala sa iyang pamahayag, nagsugod siya og usa lamang ka asawa niadtong 1961. Apan, giaghat siya sa iyang amahan nga magdugang pa og mga asawa aron modaghan ang ilang kaliwat. Sa iyang kinapungkayan, miabot pa sa 20 ang iyang mga asawa, apan sa pagkakaron, 16 na lamang ang buhi.
Gipasabot usab ni Mzee nga ang matag asawa adunay kaugalingong balay ug kusina, samtang nagtinabangay silang tanan sa pagpanguma ug pag-atiman sa ilang mga mananap aron masuportahan ang ilang dakong pamilya.
Bisan sa kadaghan sa ilang mga miyembro, iyang giingon nga ang ilang panimalay nagpadayon tungod sa kooperasyon sa tanan, ilabina sa iyang mga asawa nga maoy nagdumala sa daghang buluhaton sa matag adlaw.
Photo Courtesy:PEP.ph
