Magdeploy ang kagamhanan og moabot sa 10,000 nga mga school counselor associates sa mga pampublikong tunghaan human sa mga insidente sa kapintasan nga gikalambigitan sa mga kabatan-unan.
Matud ni Pres. Ferdinand Bongbong Marcos Jr. nga magsilbing giya ang mga school counselor associates sa mga tinun-an nga nakasinati og bullying, mental health concerns, ug uban pa nga mga personal nga problema.
Nidaghan sab matud pa ang dili maayo nga impluwensiya nga giatubang sa mga kabatan-unan lakip ang mga bayolente nga mga video games, fake news, pornography, ug uban pa nga klase sa kalaw-ayan nga anaa sa social media.
Tungod niini, nanawagan kini sa kagamhanan, sa mga tunghaan, ug mga ginikanan nga magtinabangay aron mapanalipdan ang mga bata labi na anaa sulod sa mga eskwelahan nga magsilbi nga ikaduha nila nga panimalay.
Nunot niini, nipagawas sab og direktiba ang president ngadto sa Department of Education (DepEd) ug Philippine National Police (PNP) nga palig-unon ang mga lakang alang sa kaluwasan sa mga tunghaan, lakip ang pagpalig-on sa mga programa batok bullying ug mas paspas nga pagtagad sa mga emergency.
Photo courtesy: Philippine News Agency
