Nailhan na sa kapulisan ang lalaki nga nakit-ang patay sa usa ka sapa sa Purok Rosal, Barangay Bangkal, Matanao, Davao del Sur. Matud sa Matanao Municipal Police Station, ang biktima mao si PJ Gelvero Villabeto, 19 anyos, residente sa Purok Everlasting, Barangay Bangkal.
Base sa imbestigasyon, niadtong Hulyo 26, nabilin si Villabeto sa Barangay Asinan diin caretaker ang iyang amahan. Sa pagbalik sa iyang mga ginikanan, wala na kini sa maong panimalay ug wala usab nakauli sa ilang balay sa Bangkal.
Human sa pagpangita, nailhan sa amahan ang patayng lawas pinaagi sa relo nga gisul-ob sa biktima. Samtang nagpadayon ang imbestigasyon aron matino ang hinungdan sa kamatayon, nagpahimangno ang Matanao Municipal Police Station sa publiko nga likayan ang pagtabok sa mga sapa kon kusog ang ulan ug taas ang tubig aron malikayan ang susamang trahedya.
