Naglusad ang kagamhanan sa Probinsiya sa Sugbo og Dengue Fast Lanes sa tanang 16 ka provincial ug district hospitals nga gidumala sa Kapitolyo aron mapaspasan ang pag-atiman sa mga pasyenteng adunay sintomas sa dengue.
Ang maong programa nagtugot sa mga suspetsadong kaso nga mahatagan dayon og prayoridad sa medical assessment, laboratory testing ug pagtambal aron malikayan ang grabeng komplikasyon sa sakit.
Gipatuman kini human matala sa Provincial Health Office (PHO) ang 132 ka kumpirmadong kaso sa dengue ug duha ka namatay sulod sa miaging upat ka semana. Ang lima ka local government units nga gibantayan pag-ayo mao ang Toledo City, Barili, Talisay City, Consolacion ug Carcar City tungod sa pagsaka sa mga kaso.
Sumala sa PHO, bisan pa sa pagtaas sa mga kaso, wala pa maabot sa lalawigan ang lebel sa dengue outbreak.
Apan giawhag gihapon ang publiko nga magpadayon sa pagpanglimpyo sa palibot aron mawagtang ang mga lugar nga mahimong pamugaran sa lamok ug mangonsulta dayon sa doktor kon adunay sintomas sa dengue sama sa taas nga hilanat, grabe nga sakit sa ulo, kasakit sa lawas, pagsuka ug rashes.
Photo courtesy: Sugbo News
