Patay ang 21-anyos nga suspek nga giila sa kapulisan nga si Abdul B. human kini gipusil sa Berlin Special Operations Unit (SEK) sa usa ka allotment garden sa Spandau, Germany, alas-6 sa gabii sa Domingo.
Matod sa Berlin Police, midagan ang suspek padulong sa mga operatiba samtang nagkupot og sundang, hinungdan nga gipusil kini sa mga awtoridad. Bisan pa sa gilayon nga pagresponde sa Berlin Fire Department, namatay ang suspek sa maong lugar.
Si Abdul B. mao ang giingong nagmaneho sa usa ka sakyanan nga misulod sa panon sa mga tawo atol sa selebrasyon sa LGBTQ+ sa Berlin niadtong Sabado sa gabii. Usa ka tawo ang namatay samtang 29 ang nasamdan, lakip ang pipila nga grabe ang kahimtang.
Sumala sa German Interior Minister Alexander Dobrindt, human mabanggaan ang mga biktima, migamit pa og hait nga hinagiban nga gituohang machete ang suspek aron atakehon ang ubang mga pedestrian.
Gikumpirma usab ni Dobrindt nga ang suspek usa ka German citizen nga adunay kaliwat nga Lebanese, natawo sa Germany, adunay kriminal nga rekord, ug giingong adunay kalambigitan sa radikal nga Islamist nga grupo.
Matod pa sa ministro, ang tanang ebidensiya nga ilang nakit-an nagpakita nga ang insidente usa ka Islamist terrorist attack. Padayon pa ang imbestigasyon sa mga awtoridad aron matino ang tibuok motibo sa maong pag-atake.
Photo Courtesy:OPB
