Sama sa salida ang gihimo sa usa ka lalaki sa China human siya nagpaka-aron ingon nga patay aron makalikay sa kasong drunk driving, apan napakyas ra gihapon ang iyang plano human nabisto.
Ang lalaki, nga giila sa apelyidong “Si,” nahadlok nga mapriso tungod kay ikatulo na niyang paglapas sa kaso sa pagdrayb nga hubog ug walay lisensya. Mao nga nakahunahuna siya og laing paagi sa paglubong sa iyang kaugalingon.
Gikumbinsi pa niya ang iyang pamilya nga motabang sa drama ug Mipalit sila og lungon, nagkatag og mga botelya sa tambal sulod sa balay aron murag overdose ang hinungdan sa kamatayon, ug gitabonan pa gyud sa iyang inahan ug lola ang iyang nawong atol sa burol aron dili kuno mailhan.
Apan wala mailad ang mga pulis. Nakabantay sila nga nauna pa ang pagpalit sa kabaong kaysa sa death certificate, wala usab gitawag ang ambulansya, ug walay rekord sa cremation.
Sa dihang gisusi ang CCTV ug bank records, nasakpan nga buhi pa diay si “Si” ug nagbiyahe paingon sa laing probinsya. Sa ulahi, nadakpan gihapon siya ug gisentensiyahan og lima ka bulan nga pagkabilanggo ug 20,000 yuan nga multa. Giimbestigahan usab ang iyang inahan ug lola tungod sa pagtabang sa pagtago sa usa ka wanted nga indibidwal.
Photo Courtesy:South China morning Post
