Nadakpan sa kapulisan ang usa ka 46-anyos nga lalaki nga giila sa alyas “Danny,” nga nalista isip Rank 9 Regional Level Most Wanted Person ug Rank 1 City Level Most Wanted Person sa General Santos City.
Gidakop ang suspek atol sa pagpatuman sa warrant of arrest sa Barangay Calumpang, General Santos City niadtong Hulyo 26, 2026 pinaagi sa hiniusang operasyon sa mga operatiba sa Police Station 10 sa General Santos City Police Office ug General Santos City Highway Patrol Group.
Gipagawas ang warrant of arrest batok sa suspek tungod sa mga kasong Rape by Sexual Assault, Statutory Rape ug Acts of Lasciviousness nga may kalabutan sa Republic Act No. 7610 o ang Special Protection of Children Against Abuse, Exploitation and Discrimination Act.
Human sa pagdakop, gipahibalo ang suspek sa hinungdan sa iyang pag-aresto ug sa iyang mga katungod subay sa balaod. Sa pagkakaron, anaa na kini sa kustodiya sa Police Station 10 alang sa hustong disposisyon ug padayon nga proseso sa korte.
Gipasalamatan usab ni Acting Regional Director PBGEN Alan B. Manibog ang mga operatiba nga mipahigayon sa operasyon. Matod niya, padayon ang PRO-12 sa pagpangita ug pagdakop sa mga wanted person aron maatubang sa hustisya ang mga giakusahan sa seryosong krimen, ilabina kadtong nalambigit sa mga kaso batok sa kababayen-an ug kabataan.
Photo Courtesy: PRO12
