Miubos ang trust ug performance ratings ni Vice President Sara Duterte base sa pinakabag-ong non-commissioned OCTA Research “Tugon ng Masa” survey, sumala sa Malacañang.
Matod ni Palace Press Officer Claire Castro, ang pagkunhod sa ratings ni Duterte nagpakita, matod niya, nga wala kini makatampo sa mga paningkamot sa gobyerno sa pagsulbad sa inflation ug pagsaka sa presyo sa produktong petrolyo. Dugang pa niya, ang bise presidente, matod sa Palasyo, sige lang og panaway apan wala’y ikatanyag nga solusyon.
Sa survey nga gihimo gikan Hulyo 4 hangtod 11, ang performance rating ni Duterte miubos sa 45 porsiyento gikan sa 50 porsiyento sa Marso, samtang ang iyang trust rating mikunhod sa 47 porsiyento gikan sa 55 porsiyento. Kini ang unang higayon nga miubos ang duha ka ratings sa ubos sa majority level sukad Nobyembre 2024.
Ang survey gihimo sa panahon sa pagsugod sa impeachment trial ni Duterte sa Senado niadtong Hulyo 6, diin giatubang niini ang mga reklamo lakip ang giingong sayop nga paggamit sa pondo sa publiko ug ang giingong hulga batok kang Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Samtang, miubos usab ang performance ug trust ratings ni Presidente Ferdinand Marcos Jr. ngadto sa 47 porsiyento ug 49 porsiyento. Wala kini komentarihi sa Malacañang, apan gibalik nga ang prayoridad sa administrasyon mao ang paghatag og serbisyo sa katawhan kaysa sa resulta sa mga survey.
Photo Courtesy: Philippine News Agency
