Gipahibalo ni Presidente Ferdinand R. Marcos Jr. atol sa iyang ikalimang State of the Nation Address (SONA) sa Batasang Pambansa Complex nga palapdan sa gobyerno ang mga assistance program ug ipadayon ang mga tax relief measures aron mapagaan ang pinansyal nga kabug-at nga giatubang sa milyon-milyong Pilipino, ilabina ang mga kabus nga pamilya, mga mamumuo, ug gagmayng negosyo. Matud pa sa Pangulo, naggahin ang gobyerno og kapin sa P60 bilyon alang sa mga programa sa tabang hangtod sa katapusan sa tuig. Ang pondo nga mabawi gikan sa mga iregularidad sa mga proyekto sa gobyerno ipahinungod dayon sa mga programang direkta nga mapahimuslan sa katawhan. Giingon usab niya nga palapdan ang sakop sa Pantawid Pamilyang Pilipino Program (4Ps) ug Walang Gutom Program aron mas daghang nanginahanglan ang makadawat og ayuda.
Gipasabot sa Pangulo nga ang gipalapad nga tabang makaabot sa 3.5 milyon ka benepisyaryo sa 4Ps ug Walang Gutom Program, 1.5 milyon ka minimum wage earners nga miyembro sa Social Security System (SSS), ug 2.5 milyon ka kabus nga Pilipino nga wala pa makadawat og suporta gikan sa gobyerno.
Magpadayon usab ang tabang alang sa sektor sa transportasyon, mga mag-uuma, uban pang mga stakeholder sa agrikultura, ug mga overseas Filipino workers (OFWs) nga naapektuhan sa kawalay kasiguruhan sa kalibutan. Sumala sa Pangulo, sa kinatibuk-an kapin sa 7.5 milyon ka pamilya ang matabangan pinaagi sa mga programang gilatid sa administrasyon.
Gawas sa pagpalig-on sa social protection programs, gipasiugda usab ni Marcos ang panginahanglan sa tax relief alang sa middle class ug gagmayng negosyo. Gihangyo niya ang Kongreso nga ipasa ang balaod nga magpalapad sa income tax exemption alang sa mga mamumuo nga adunay tinuig nga kita nga dili molapas sa P350,000, ug pagkunhod sa income tax rates alang sa uban pang mga empleyado. Lakip usab sa gisugyot nga reporma ang pagtangtang sa minimum corporate income tax alang sa gagmayng negosyo ug paghatag og tax amnesty sa pipila ka wala mabayring buhis. Gipasiugda usab sa Pangulo ang kahinungdanon sa pagpalig-on sa national security, food ug energy stability, internasyonal nga relasyon, ug mas episyenteng pagtubag sa gobyerno sa mga emerhensiya aron mas mapanalipdan ang tanang Pilipino, ilabina ang mga labing huyang nga sektor.
Photo courtesy: PCO
