Nagpabiling zero case sa African Swine Fever o ASF ang lalawigan sa Misamis Oriental, sumala sa Provincial Veterinary Office.
Matud ni Provincial Veterinarian Dr. Benjie Resma, padayon ug mas gipahugtan sa PVET ang pagmonitor sa mga animal control checkpoint aron mapugngan ang pagsulod sa mga baboy, karne, ug mga nilutong produktong baboy nga walay igong permit gikan sa silingang mga probinsya.
Giawhag usab sa PVET ang mga mag-uuma nga likayan ang pagpakaon sa ilang mga baboy og pasaw o swill feeding, tungod kay mahimo kining hinungdan sa pagkatap sa ASF virus.
Gipasabot ni Resma nga hangtod karon, wala pa gihapoy hingpit nga bakuna batok sa sakit, busa ang pagsunod sa biosecurity measures ang labing epektibong paagi aron mapanalipdan ang industriya sa pag-uma og baboy sa lalawigan.
Photo Courtesy:Provincial Veterinary Office Misamis Oriental
