Nakaapekto sa habagatang bahin sa Tsina ang Bagyong Noul niadtong Domingo ug mitugpa sa Guangdong, nga nagdala og kusog nga ulan ug hangin nga nakahatag og dakong hulga sa pagbaha.
Sumala sa lokal nga mga awtoridad, kapin sa 800,000 ka residente ang gipabalhin ngadto sa mas luwas nga mga lugar, samtang labaw sa 350 ka flights ang kanselado sa Hong Kong. Kapin sa 20 ka tawo usab ang nasamdan tungod sa kusog nga hangin ug ulan.
Mitugpa ang bagyo sa baybayon sa Huidong County alas 3:50 sa kaadlawon, nga hinungdan sa kusog nga pag-ulan ug pagbaha sa daghang lugar. Nagpagawas ang China Meteorological Administration og pulang pasidaan batok sa flash floods alang sa mga probinsya sa Jiangxi, Hunan, Guangdong, Sichuan, Shaanxi, Gansu, ug habagatan-sidlakang Xinjiang. Gilauman nga magpadayon ang kusog nga ulan hangtod Martes, nga nagdugang sa risgo sa pagbaha ug landslide sa mga kabukiran ug daplin sa mga suba.
Bisan og nahuyang na ang Bagyong Noul ngadto sa lebel sa tropical storm samtang misulod sa mainland, nagpabilin gihapon ang dakong hulga sa mga apektadong lugar. Naggahin ang gobyerno sa Tsina og 100 milyon yuan alang sa relief ug rehabilitasyon sa Guangdong. Samtang, hinay-hinay nang mibalik sa normal ang operasyon sa Hong Kong International Airport human sa kapin 12 ka oras nga pagsuspinde sa mga biyahe. Ang Bagyong Noul, nga nailhang Bagyong Kiyapo sa Pilipinas, usa sa labing kusgan nga bagyo nga miigo sa Tsina karong tuiga.
Photo courtesy: Youtube/ Nature Damage
