Namatay ang labing menos 10 ka indibidwal ug hapit 100 pa ang nasamdan human sa ballistic missile attack sa Russia sa usa ka lugar duol sa Kyiv, Ukraine niadtong Biyernes.
Nahitabo ang pag-atake usa ka adlaw human makigtagbo si Presidente Volodymyr Zelenskyy sa mga representante sa kompanyang Amerikano nga Raytheon, nga naghimo sa Patriot air defense system nga gikinahanglan sa Ukraine aron mapalig-on ang depensa niini batok sa mga missile attack sa Russia.
Sumala sa mga awtoridad, ang missile miigo sa usa ka pribadong military training site diin adunay kalihokan nga gitambongan sa mga representante sa defense industry. Nadaot usab ang 27 ka balay ug 44 ka sakyanan.
Gipahigayon na sa Ukrainian Prosecutor General ang imbestigasyon aron mahibal-an kung adunay paglapas sa balaod sa gubat ug kung nasunod ba ang angayng seguridad sa maong kalihokan.
Samtang, mipahibalo usab ang Russia nga unom ka tawo ang namatay ug 26 ang nasamdan human sa pag-atake sa Ukraine sa usa ka military plant sulod sa teritoryo sa Russia.
Padayon ang nagkagrabeng panagsangka tali sa duha ka nasud samtang wala pa gihapon makab-ot ang kalinaw sa nagpadayon nga gubat.
Photo Courtesy: BBC
