Gipahibalo ni Pangulong Ferdinand Marcos Jr. nga ang iyang ika-lima nga State of the Nation Address (SONA) karong Hulyo 27 magpunting sa lisod nga kahimtang nga giatubang sa Pilipinas ug sa mga lakang nga gihimo sa iyang administrasyon aron maatubang ang nagkadaiyang hagit.
Matud pa sa Presidente, gusto niyang mahibal-an sa katawhan ang mga nahimo sa gobyerno aron malampasan ang mga pagsulay nga giatubang sa nasud tungod sa nagkadaiyang panggawas nga mga isyu.
Lakip sa mga hagit nga giatubang sa Pilipinas ang nagpadayon nga tensyon sa West Philippine Sea, epekto sa nagkagrabeng gubat sa Middle East sa ekonomiya, ug ang mga kalamidad nga may kalabutan sa klima.
Giatubang usab sa administrasyon ang mga pangutana bahin sa kontrobersiya sa flood control projects ug sa pagpatuman sa mga repormang ekonomiya aron maminusan ang epekto sa nagpadayon nga kagubot sa Middle East.
Bisan pa niini, nag-ingon si Marcos nga epektibo ang tubag sa gobyerno sa mga hagit ug ang gihimong mga pagbag-o nakatabang aron makalahutay ang mga Pilipino sa lisod nga kahimtang samtang naghulat nga mobalik sa normal ang sitwasyon.
Gibutyag usab sa Presidente nga siya mismo ang nagsulat sa iyang SONA ug padayon pa niyang giusab ang sulod niini aron masiguro nga kompleto ang mga isyung iyang hisgutan ug dili usab molapas o mokulang sa gitas-on sa iyang mensahe.
Sa dihang gipangutana kung hisgutan ba niya pag-usab ang kontrobersiya sa flood control projects nga iyang gisita sa miaging SONA, wala siya motubag og diretso ug miingon lamang nga hulaton ang sunod nga kapitulo.
