Patay ang mayor sa lungsod sa Temoac sa estado sa Morelos, Mexico human gipusil sulod mismo sa iyahang opisina sa municipal hall, sumala sa mga awtoridad niadtong milabay’ng adlaw.
Giila ang biktima nga si Mayor Valentin Lavin, kaalyado sa nagharing partido ni Presidente Claudia Sheinbaum. Matud pa sa mga lokal nga taho, nakalingkawas na kaniadto si Lavin sa usa ka pag-atake sa mga armadong tawo niadtong bulan sa Enero.
Giingon sa State Prosecutor’s Office nga napalgang patay ang mayor sulod sa pasilidad sa lokal nga kagamhanan. Gilusad na sa kapulisan ug mga imbestigador ang operasyon aron madakpan ang mga responsable sa maong krimen.
Nasayran nga nahimutang ang lungsod sa Temoac sa estado sa Morelos, duol sa Mexico City, nga usa sa mga lugar nga giila nga adunay kalihokan sa nagkadaiyang drug cartel.
Base sa opisyal nga rekord, hapit 100 ka mayor na ang gipamatay sa Mexico sukad sa 2006, panahon nga misamot ang krimen nga may kalabutan sa ilegal nga droga.
Kahinumduman, nga niadtong Nobyembre, gipusil ug napatay usab si Mayor Carlos Manzo sa estado sa Michoacan atol sa kasaulogan sa Day of the Dead, nga nakapakurat sa tibuok nasud.
Photo Courtesy: The Guardian
