Usa ka talagsaon ug breathtaking view nga tourist attraction ang nakadani karon sa daghang bisita sa Mangshan National Forest Park sa Chenzhou, China.
Gitawag kini og “Cliff Bed Experience”, diin ang mga bisita gitugotan nga mopahulay sa usa ka kahoy nga higdaanan nga gibutang sa kilid sa pangpang nga adunay gitas-on nga kapin 320 ka pye o halos 98 ka metros.
Gilusad ang maong atraksyon niadtong Abril 25, 2025, isip usa ka bag-ong paagi sa pagpahayahay ug paghatag og talagsaong kasinatian alang sa mga mahigugmaon sa adventure ug kinaiyahan.
Apan dili tanan mahimong mopasalig niini. Kinahanglan ang mga partisipante adunay edad 14 hangtod 60 anyos, samtang ang mga menor de edad kinahanglan adunay kauban nga hamtong. Aduna usab kini’y limitasyon sa timbang, gitas-on, ug gidak-on sa hawak aron masiguro nga haum sila sa safety harness.
Sa dili pa moadto sa Cliff Bed pinaagi sa cable car, gikinahanglan ang matag bisita magfill-up og health declaration form ug magpakita og valid ID. Ang mga adunay sakit sa kasingkasing, taas nga presyon sa dugo, ug uban pang seryosong kondisyon mahimong dili tugotan sa maong kalihokan.
Ang bayad sa maong kasinatian mokabat sa 98 yuan, o dul-an sa ₱750, nga nagtugot sa bisita sa pagpabilin sulod sa usa ka oras ug tunga.
Ang higdaanan adunay air mattress, unlan, habol, ug safety harness nga nakataod sa pangpang. Aduna usab kini’y lugar alang sa ilimnon ug sapatos, ug libre pang kape alang sa mga bisita.
Bisan pa sa ngalan niini, dili kini gituyo alang sa tinuod nga pagkatulog, kondili alang sa pagpahayahay, pagtan-aw sa talan-awon, ug pagkuha og mga litrato.
Sumala sa mga nakasulay na, luwas ug makalingaw ang maong atraksyon tungod kay nagsunod kini sa Via Ferrata safety standards ug adunay kauban nga propesyonal nga guide sa tibuok kasinatian.
Sa pagkakaron, kapin na sa 400 ka mga bisita ang nakasulay sa Cliff Bed Experience, nga usa na sa mga talagsaong adventure destination sa China.
Photo Courtesy: New York Post
