Nahuwasan sa kakulba ang usa ka Grade 9 student sa Bacolod City human mapamatud-an nga dili shabu, kundili tawas lamang ang sulod sa duha ka sachet nga nakit-an sa iyang bag.
Sa sinugdan, murag salida na sa crime series ang dagan sa istorya kay giingong kapin 30 gramos sa gidudahang shabu ang narekober. Apan pag-abot sa resulta sa forensic laboratory, kalit lang nga nausab ang istorya, tungod ang gidudahang kontrabando nahimong pangpawala ra diay sa baho sa ilok. Gani, ang uban nagbinuang nga imbis “drug test,” nahimong “underarm test” ang nahitabo.
Sa padayong imbestigasyon, nasuta nga prank ra diay sa usa ka kaubanang estudyante niini ang pagbutang sa mga naka-sachet nga tawas sa iyang bag. Busa ang leksyon sa maong hitabo, ayaw gyud paghimog prank nga makadani ug forensic team, kay basin ang tawas nga pang-ilok, mahimong hinungdan sa pinakasingot nga adlaw sa imong kinabuhi.
Photo Courtesy: Pilipino Mirror
