Nakaplagan sa usa ka pagtuon nga 78 porsyento sa mga mamumuo sa Pilipinas ang naggamit na og artificial intelligence (AI) sa ilang adlaw-adlaw nga trabaho, apan 35 porsyento lamang ang nakadawat og AI training nga gipahiangay sa ilang trabaho.
Base sa pagtuon sa Sprout Solutions nga gilambigit ang 3,516 ka empleyado gikan sa 13 ka industriya, kasagaran gigamit ang AI sa komunikasyon, pagproseso sa impormasyon ug pagtabang sa paghimo og mga desisyon. Ang industriya sa konstruksyon maoy adunay pinakataas nga naggamit sa AI, gisundan sa transportasyon ug storage, ug health ug social work.
Gipakita usab sa pagtuon nga ang mga software developer maoy labing aktibong naggamit sa AI, uban sa mga nagtrabaho sa project management ug human resources.
Bisan pa sa pagsaka sa paggamit sa AI, 29 porsyento sa mga empleyado ang miingon nga wala gayoy AI training nga gihatag sa ilang kompanya, samtang 36 porsyento ang wala mahibalo kon adunay maong programa.
Matod sa Sprout Solutions, posible nga adunay kinatibuk-ang AI training ang ubang kompanya, apan wala kini mapahiangay sa espesipikong buluhaton sa matag empleyado, hinungdan nga daghan gihapon ang nagkinahanglan og dugang nga pagbansay.
Photo Courtesy: Exper Train
