Gipili ni Pangulong Ferdinand Bongbong Marcos Jr. nga mahimong yano ug walay dagkong pasundayag ang iyang ikalimang State of the Nation Address (SONA) karong Hulyo 27, bisan pa sa nagpadayon nga mga hagit nga giatubang sa nasud ug sa kalibutan, lakip ang panagbangi sa Middle East ug pagsaka sa presyo sa lana.
Sumala kang Palace Press Officer Claire Castro, mao mismo kini ang gusto sa Pangulo aron ang programa magpabiling yano apan adunay dignidad.
Wala usab ilakip sa maong programa ang mga celebrity director o espesyal nga mga pasundayag. Hinuon, ang Philippine Charity Sweepstakes Office Chorale maoy mokanta sa Lupang Hinirang, samtang ang Radio Television Malacañang (RTVM) maoy magdumala sa programa.
Ang House of Representatives, nga maoy mag-host sa maong kalihokan, padayon usab nga nakigtinabangay sa Office of the President alang sa mga pagpangandam.
Gilauman nga ihatag ni Pangulong Marcos ang iyang ikalimang SONA atol sa hiniusang sesyon sa Kongreso sa Hulyo 27, diin iyang hisgutan ang mga nahimo sa administrasyon, ang kahimtang sa nasud, ug ang mga prayoridad nga programa sa nahibiling panahon sa iyang termino.
Photo Courtesy: Philippine News Agency
