Napasakaan na og mga kasong kriminal ang upat ka mga suspek nga nadakpan sa hiniusang operasyon batok sa Online Sexual Abuse or Exploitation of Children (OSAEC) sa Digos City ug Matanao, Davao del Sur.
Sa Digos City, tulo ka mga suspek ang giatubang og mga kaso sa paglapas sa Republic Act No. 11930 o Anti-OSAEC and Anti-CSAEM Act, Republic Act No. 9208 nga giusab sa RA 10364 ug gipalapdan sa RA 11862, Republic Act No. 7610 o Anti-Child Abuse Law, ug Republic Act No. 9165 o Comprehensive Dangerous Drugs Act.
Naluwas usab sa operasyon ang lima ka mga batang giingong gi-offer online ug tulo ka child at risk. Sa Matanao, usa ka suspek ang napasakaan usab og mga kaso ubos sa RA 11930, RA 9208 nga giusab sa RA 10364 ug RA 11862, ug RA 7610.Tulo usab ka mga menor de edad ang naluwas sa maong operasyon.
Matud pa ni PLTCOL Romeo D. Balubal Jr., OIC, WCPC, Mindanao Field Unit nga dili angay himuong panginabuhian sa mga ginikanan ang ilang mga anak pinaagi sa paggamit sa cellphone o ubang gadgets.
Hisayran nga nasubay sa mga otoridad ang maong kalihokan human madakpan ang usa ka langyaw sa laing nasud. Sa dihang gisusi ang mga gadget niini, nadiskobrehan nga adunay mga biktimang Pilipino, hinungdan nga nakigtambayayong ang mga awtoridad sa Pilipinas ug gipahigayon ang hiniusang operasyon batok sa mga suspek.
