Gibutyag ni Vice Ganda nga ang iyang pakigtambayayong sa usa ka patigayon dili lang alang sa negosyo kondili naggikan usab sa dugay na nilang panaghigalaay ug pagtinabangay sa scholarship program uban sa CEO sa kompanya nga si Rei Anicoche-Tan.
Matud ni Vice, dugay na silang nagtinabangay sa pagpaeskwela sa mga kabatan-onan bisan wala pa sila’y opisyal nga kontrata isip brand ambassadors. Gipasalamatan usab niya si Anicoche-Tan sa padayon nga suporta sa edukasyon ug paghatag kaniya og higayon nga mahimong instrumento sa pagtabang sa mga estudyante.
Gipaambit usab sa komedyante nga dili niya kinahanglan makita ug mailhan ang tanan niyang scholars. Alang niya, mas importante nga makahuman sila sa ilang pag-eskwela. Giingon usab niya nga ang iyang pagtabang usa ka paagi sa pagbalos sa kaayohan nga iyang nadawat kaniadto gikan sa usa ka Japanese sponsor nga nagpatungha kaniya gikan sa Grade 3 hangtod kolehiyo, bisan wala na niya kini makita pag-usab.
Photo Courtesy: Pep.ph
