Gipangayoan og pasabot sa Bangko Sentral ng Pilipinas (BSP) ang pipila ka mga bangko ug e-wallet providers nga wala pa nagtangtang o nagpaubos sa ilang money transfer fees.
Bisan og daghang bangko ang nagpatuman na og zero transfer fee, adunay uban nga nagpadayon gihapon sa pagsukol og bayronon. Lakip niini ang GCash ug Maya, nga naningil gihapon og ₱10 nga InstaPay transfer fee sa pagpadala og kwarta ngadto sa ubang bangko.
Sumala kang BSP Deputy Governor Mamerto Tangonan, gipangayo sa BSP ang detalyadong pagpasabot ug cost analysis aron masusi kung ang ilang transfer fees nagtuman ba sa BSP Circular No. 1238, nga nag-awhag sa mga financial institution sa patas ug makatarunganong pagsukol og bayronon.
Padayon karon nga giberipika sa BSP ang mga report nga gisumite sa mga bangko ug e-wallet firms.
Matud pa sa BSP, ang pagpaubos sa transfer fees makabenepisyo sa mga kustomer ug makatabang usab sa pagpalambo sa digital payment system sa nasud. Sa pagkakaron, kadaghanan sa dagkong mga bangko ang mituman na sa maong polisiya pinaagi sa pagtangtang o pagpaubos sa ilang transfer fees.
Photo Courtesy: Spot.ph
