Gilimod sa gobyerno sa Jordan ang mga taho nga adunay gimando nga pag-evacuate o pagsira sa Aqaba International Airport ug Aqaba Seaport tungod sa giingong hulga sa seguridad.
Kini human mopahibalo ang Embahada sa Estados Unidos sa Amman nga gi-evacuate ang maong mga pasilidad tungod sa security threat.
Apan matod ni Jordanian government spokesperson Mohammad al-Momani, wala magpagawas ang mga awtoridad og bisan unsang sugo sa pag-evacuate sa mga pasahero ug mga empleyado sa airport ug seaport.
Gipasabot pa niya nga nagpadayon sa normal nga operasyon ang Aqaba Airport ug Aqaba Seaport ug wala usab makit-i sa mga awtoridad ang bisan unsang potensyal nga hulga sa seguridad nga mahimong makahatag og peligro sa publiko.
