Gitudlo ni Presidente Ferdinand Marcos Jr. ang kanhi Albay Representative nga si Joey Salceda isip bag-ong secretary sa Presidential Legislative Liaison Office (PLLO).
Kahibaloan nga ang PLLO mao ang ahensya sa gobyerno nga responsable sa pagpalig-on sa koordinasyon tali sa Malacañang ug Kongreso aron mapadali ang pagpatuman sa legislative agenda sa administrasyon.
Sumala sa appointment letter nga penitsahan niadtong Hulyo 20 ug gipirmahan sa presidente, nagtimaan kini sa pagbalik ni Salceda sa Gabinete human sa kapin duha ka dekada. Nasayran nga ang kataposan niyang pagserbisyo niadto pang 2007 isip presidential chief of staff ubos sa administrasyon ni kanhi Presidente Gloria Macapagal-Arroyo.
SiSalceda adunay halapad nga kasinatian sa ekonomiya ug pinansya, lakip ang iyang pagserbisyo isip research director sa mga multinational investment firms sama sa UBS, SBC Warburg, ug ING Barings. Gani, nailhan usab siya isip usa sa labing maayo nga financial analysts sa Asia-Pacific sa iyang panahon sa pribadong sektor.
Samtang, gipasalamatan usab ni Salceda si Presidente Marcos sa pagsalig niini ug kompiyansa nga gihatag kaniya isip bag-ong pangulo sa Presidential Legislative Liaison Office.
Photo Courtesy: Philippine News Agency
