Misaka ang ihap sa mga nasud sa kalibotan nga nagpatuman o nagplano og mga balaod aron i-ban ang paggamit sa social media, ilabina sa mga menor de edad, isip kabahin sa paningkamot sa pagpanalipod sa ilang kahimsog sa pangisip, kaluwasan, ug kaayohan sa online nga kalibutan.
Sa France, gikatakdang botohan sa mga magbabalaod ang usa ka sugyot nga magdili sa paggamit sa social media alang sa mga batang ubos sa 15 anyos. Kung ma-aprobahan, mahimong apil ang France sa kapin 20 ka nasud nga adunay parehas nga mga lakang.
Sa pagkakaron, lima ka nasud ang adunay epektibong mga restriksyon. Lakip niini ang Australia, diin sukad pa sa Disyembre 2025 gidili na ang social media alang sa mga ubos sa 16 anyos. Sa Brazil, gikinahanglan nga ang account sa mga ubos sa 16 anyos ikonekta sa account sa ilang ginikanan ug obligado usab ang mga plataporma nga beripikahon ang edad sa mga tiggamit.
Sa China, anam-anam nga gipahugtan ang paggamit sa internet sa mga menor de edad sukad pa sa 2019. Gikan sa limitasyon sa online gaming, gipalapdan kini ngadto sa social media ug streaming platforms niadtong 2023.
Sa Indonesia ug Malaysia, epektibo na usab ang mga balaod nga nagdili sa paggamit sa dagkong social media platforms alang sa mga ubos sa 16 anyos. Samtang sa Turkey ug United Arab Emirates, gilauman nga ipatuman ang susamang mga balaod sa ulahing bahin sa 2026 ug sa umaabot nga tuig.
Photo Courtesy: Linkedln
