Tulo ka indibidwal patay human makumpirmang natakdan sa hantavirus sa estado sa Anzoátegui, Venezuela. Sumala sa health ministry, giimbestigahan usab ang pagkamatay sa duha ka health workers sa Barinas tungod sa posibilidad nga nalambigit kini sa maong virus. Apan sa pagkakaron, wala pay ebidensya nga adunay koneksyon ang ilang kamatayon sa mga kaso sa Anzoátegui.
Ang hantavirus kasagarang mapasa ngadto sa tawo pinaagi sa ihi, hugaw, o laway sa mga ilagang adunay virus, ilabina sa mga rural ug agricultural nga lugar. Mahitabo ang impeksyon kon masimhot o ma-expose ang usa ka tawo sa kontaminadong hangin o materyales.
Giklaro sa mga otoridad sa Venezuela nga wala pay lig-ong ebidensya nga ang virus napasa gikan sa usa ka tawo ngadto sa laing tawo sa nasud.
Matud pa sa US Centers for Disease Control and Prevention (CDC), ang Andes virus lamang ang matang sa hantavirus nga napamatud-ang mahimong mapasa pinaagi sa human-to-human contact.
Photo Courtesy:Netec
