Gikumpirma sa Department of Energy (DOE) nga ang Pilipinas adunay pinakataas nga singil sa kuryente taliwala sa mga nasud sa ASEAN niadtong Hunyo 2026.
Sumala kang DOE Undersecretary Rowena Cristina Guevara, miabot sa ₱12.43 kada kilowatt-hour (kWh) ang kasagarang presyo sa kuryente sa nasud, nga mas taas og ₱0.093 kada kWh kumpara sa Singapore.
Matud pa ni Guevara, ang Visayas ang adunay pinakataas nga presyo tungod sa kakulang sa suplay sa kuryente. Mokabat sa 21 ka planta sa kuryente ang naa sa forced outage, maong nagsalig ang rehiyon sa imported nga kuryente gikan sa Luzon ug Mindanao.
Dugang pa niya, sukad pa sa Mayo 13 kanunay nang gideklarar og yellow alert ang Visayas Grid, nga nagpasabot nga kulang ang reserbang suplay aron masiguro ang lig-on nga operasyon sa transmission system. Lakip sa mga planta nga wala nag-operate ang mga yunit sa Therma Visayas Inc. ug Panay Energy Development Corporation.
Usa usab sa hinungdan sa pagsaka sa presyo mao ang taas nga panginahanglan sa kuryente atol sa ting-init, diin napugos ang mga power provider sa paggamit sa mas mahal nga mga planta aron malikayan ang brownout.
Samtang, ang Manila Electric Company o Meralco mipahibalo nga misaka og ₱0.1488 kada kWh ang singil sa kuryente niadtong Hunyo, nga nagdala sa kinatibuk-ang residential rate ngadto sa ₱14.4833 kada kWh. Katumbas kini sa dugang nga ₱29.76 sa binulan nga bayranan sa panimalay nga nagkonsumo og 200 kWh.
Alang sa Hulyo, misaka na usab ang singil sa Meralco og ₱0.3428 kada kWh, nga nagdala sa bag-ong rate ngadto sa ₱14.8621 kada kWh. Gibanabana nga mosaka og mga ₱69 ang bayranan sa usa ka tipikal nga panimalay nga adunay 200 kWh nga konsumo matag bulan.
Photo Courtesy: SUNation Energy
