Murag salida sa komedya apan tinuod! Usa ka bana sa Texas, USA ang nakahunahuna nga mas sayon pa kunong magpakidnap kaysa mangayo og permiso sa iyang asawa aron makigkita sa barkada.
Si Rogelio Andaverde, imbes nga moingon sa iyang asawa nga makig-inom siya sa iyang mga higala, nagpakuha hinuon sa duha ka kauban nga nagsul-ob og maskara ug nagdala og pusil aron “kidnapon” siya sulod mismo sa ilang balay.
Nalibog ug nahadlok ang iyang asawa nga si Maria ug dihadiha mitawag sa pulis. Tungod sa kabug-at sa insidente, daghang deputy sheriff ang gipalihok ug gipagamit pa og helicopter aron pangitaon ang giingong biktima sa kidnapping.
Apan human sa duha ka adlaw, murag walay nahitabo nga mipauli si Rogelio ug miingon nga gibuhian lang siya sa mga kidnapper. Sa dihang giimbestigahan sa mga otoridad, miangkon siya nga drama ra diay ang tanan aron makalakaw siya uban sa iyang barkada nga walay samok gikan sa iyang asawa.
Ang resulta? Imbes nga hangover gikan sa party, kaso hinuon ang iyang nadawat ug napugos pa siyang magpyansa og lima ka libong dolyar.
Photo courtesy:Brave Minds
