Gidagsa sa mga job seeker ang gipahigayong PESO Ipil Job Fair isip kabahin sa kasaulogan sa ika-77th Araw ng Ipil. Ang maong kalihukan gipasiugdahan sa Department of Labor and Employment (DOLE) pinaagi sa PESO Ipil, uban sa suporta sa Lokal nga Panggamhanan sa Ipil. Sayo pa lang sa buntag, daghan na ang mga aplikante nga naglinya aron mangita og oportunidad sa trabaho gikan sa nagkadaiyang lokal ug pribadong kompanya nga mitambong sa kalihokan.
Kabahin sa job fair ang paghatag og higayon sa mga residente sa Ipil ug kasikbit nga mga lungsod nga makakita og angay nga panginabuhian. Gilauman sa mga organizers nga pinaagi niini, mas daghang mga aplikante ang mahatagan og trabaho ug mapadali ang ilang pag-empleyo pinaagi sa direkta nga pag-atubang sa mga employers.
Presente usab ang nagkadaiyang ahensya sa gobyerno nga naghatag og libre nga serbisyo ug tabang sa mga aplikante. Lakip niini ang DOLE, SSS, PhilHealth, Pag-IBIG Fund, ug uban pang ahensya nga mitabang sa pagproseso sa mga kinahanglanong dokumento ug paghatag og impormasyon aron mahimong mas sayon ug hapsay ang pag-aplay sa trabaho.
Nagpasalamat ang DOLE, PESO Ipil, ug ang Lokal nga Panggamhanan sa Ipil sa tanang employers, partner agencies, ug mga job seeker nga nakiisa sa maong kalihokan. Ang Job Fair usa lamang sa daghang mga aktibidad nga gihimo isip kabahin sa pagsaulog sa ika-77th Araw ng Ipil, nga nagtumong sa pagpalambo sa panginabuhian ug paghatag og dugang oportunidad sa trabaho alang sa katawhan.
