Misaka ngadto sa 3.1% ang bahin sa mga nagtrabahong kabataan gikan sa kinatibuk-ang populasyon sa mga bata sa Pilipinas niadtong tuig 2025, itandi sa 2.7% sa miaging tuig. Matod sa Philippine Statistics Authority (PSA), gibana-bana nga miabot ngadto sa 869,000 ang ihap sa mga nagtrabahong bata nga nag-edad singko ngadto sa 17-anyos, diin mas taas kini og gamay sa 861,000 nga natala niadtong 2024. Sa gidaghanon, mga lalaki ang nag-unang porsyento nga mitala og 61.6%, samtang 38.4% usab ang mga babaye.
Sa sektor sa ekonomiya, ang “services sector” gihapon ang adunay pinakadakong bahin sa mga nagtrabahong kabataan nga mitala og 48.7%, bisan pa man mios-os kini gikan sa 50.4% niadtong 2024. Gisundan kini sa sektor sa agrikultura nga misaka ngadto sa 41.2%, samtang ang industriya ang adunay labing gamay nga bahin sa 10.1%. Giklaro usab sa PSA nga kadaghanan sa mga bata, o 69.1%, nagtrabaho lang og 20 ka oras o paubos matag semana.
Sa pikas bahin, misaka usab ngadto sa 514,000 ang gidaghanon sa mga kabataan nga nalambigit sa “child labor” o kadtong nagtrabaho sa makuyaw nga sitwasyon o sobra sa 40 ka oras matag semana. Ang sektor sa agrikultura ang nag-unang natala nga adunay pinakadakong bahin sa child labor nga miabot sa 65.5%, diin kasagaran sa mga nalambigit niini mga batang lalaki nga mikabat sa 374,000 o 72.7% sa kinatibuk-ang ihap sa mga biktima sa child labor.
Photo courtesy:Wordpress.com
