Dili moubos sa unom ka tawo ang namatay samtang sobra sa 30 ang naangol human gitay-og sa duha ka magkasunod nga linog ang bulubunduking bahin sa Chupaca sa rehiyon sa Junín, Peru kagahapon Domingo, Hulyo 19, 2026.
Subay sa taho sa National Seismological Center sa Peru, naitala ang Magnitude 5.1 nga pagtay-og sa lalim nga 24 kilometro, nga gisundan sa Magnitude 3.7 nga pagtay-og sa giladmon nga 18 kilometro sa dapit nga gibana-banang 300 kilometro sa sidlakan gikan sa kapital nga siyudad sa Lima.
Mitaho usab ang European-Mediterranean Seismological Centre nga miabot sa Magnitude 5.6 ang gikusgon sa unang paglinog nga miresulta sa pagkaguba sa mga kabalayan ug pagkahadlok sa mga residente.
Tungod sa maong pagtay-og, miabot sa 48 ka mga balay ang hingpit nga naguba ug 18 pa ang naapektuhan pag-ayo, diin kasagaran niini ginama sa adobe blocks o lapok nga daling maguba atol sa linog.
Gibana-banang 300 ka mga lumulupyo ang nawad-an og puy-anan ug kasamtangan karong gipang-apud-apudan og mga tents aron mahimong temporaryong kapuy-an, samtang padayon pa ang pagpangita sa mga posibleng natabunan sa mga natumpag nga building ug kalsada.
Ang Peru nahimutang usab sa Pacific Ring of Fire, usa ka rehiyon sa kalibutan diin nagagikan ang hapit 85 porsyento sa tanang mga pagtay-og ug paglinog.
Photo Courtesy:NBC News
