“Till Death Do Us Part”
Nakapukaw og daghang atensyon ang usa ka kasal sa Pinhalzinho, São Paulo, Brazil, human sa talagsaong entrance sa bride pinaagi sa pagsakay sa purlon padulong sa venue sa ilang kasal.
Ang bride nga si Daniela Signor naminyo kang Apollo Scariot, usa ka funeral director o undertaker. Matod ni Daniela, una niyang nakita si Apollo atol sa haya sa usa sa iyang paryente niadtong Abril 2023 ug didto siya nahigugma sa unang pagtan-aw. “ Love at 1st sight”
Bisan pa sa iyang mga paningkamot nga mapansin sa batan-ong undertaker, mikabat pa og duha ka tuig ug daghang memorial services una siya namatikdi ni Apollo, kinsa nakatutok pag-ayo sa iyang trabaho.
Sa katapusan, nagsugod ang ilang pag-istoryahanay nga misangpot sa ilang pag-uyab ug kasal niadtong Mayo 17.
Aron sa pagpasidungog sa ilang talagsaong love story, mipili si Daniela nga mosakay sa karo sa punerarya isip iyang bridal car. Matod sa magtiayon, daghan ang nakurat sa ilang entrance, apan human nilang gisaysay ang istorya sa ilang panagtagbo atol sa seremonya, nasabtan sa ilang mga bisita ang kahulugan niini.
Dugang pa, bisan sa ilang pagbiyahe padulong sa honeymoon, gigamit gihapon sa magtiayon ang maong karo nga adunay mensaheng Portuguese “Até que a morte nos separe” buot pasabot “Till death do us part,” isip simbolo sa ilang panaghiusa.
Photo Courtesy:pep. ph
