Magpahigayon og Service Caravan ang Davao Light and Power Company (DLPC) sa New Corella Municipal Gymnasium ning probinsya sa Davao del Norte sugod Hulyo 20 hangtod Hulyo 23, 2026.
Sumala sa kompanya, tumong sa maong kalihokan nga mapaduol ug mapadali ang proseso sa customer contract signing alang sa mga konsumante sa giingong lungsod.
Giawhag sa Davao Light ang tanang mga kustomer nga motambong sa Service Caravan aron makumpleto ang ilang kontrata ug mapinal ang ilang account.
Kinahanglan nga dalhon sa mga moapil ang daang billing gikan sa ilang miaging service provider, photocopy sa usa ka valid ID nga adunay tulo ka specimen signatures, ug ang orihinal nga valid ID alang sa beripikasyon.
Gilauman nga pinaagi sa maong caravan, mas sayon ug mas paspas nga mahatagan og serbisyo ang mga konsumante sa New Corella.
Photo Courtesy: Davao Light and Power Co.
