Dakong garbo alang sa General Luna ug sa tibuok Siargao, sakop sa lalawigan sa Surigao del Norte, human opisyal nga nakakuha og wildcard spot sa World Surf League o WSL Championship Tour Philippines Pro ang lokal nga surfer nga si John Mark “Marama” Tokong.
Gipahibalo ang maong anunsyo atol sa media launch sa torneyo niadtong nakalabay nga adlaw, diin gisaulog sa Lokal nga Panggamhanan sa General Luna ang maong kalampusan sa ilang bantugang surfer.
Si Tokong, nga natawo ug nagdako sa General Luna, mosalmot sa kompetisyon nga ipahigayon sa bantugang Cloud 9, nga sugdan Oktubre 31 hangtod Nobyembre 10, 2026.
Dugang pa niini, dakong dungog usab alang sa Pilipinas tungod kay ang Cloud 9 sa General Luna mao ang unang venue sa nasud nga mahimong opisyal nga host sa World Surf League Championship Tour alang sa season 2026–2027.
Gawas kang Tokong, adunay duha pa ka wildcard slots nga igahatag alang sa mga Pilipinong surfer, usa alang sa lalaki ug usa alang sa babaye, aron makigsangka sa labing kusgan nga mga surfer gikan sa nagkalainlaing bahin sa kalibutan.
Ang pagpili kang Tokong isip wildcard entry nagpakita sa nagkadako nga kalig-on sa talento sa mga Pilipino sa surfing ug nagpadayon sa pagpaila sa General Luna, Siargao isip usa sa labing inila nga surfing destinations sa kalibutan.
Sa kasamtangan, padayon ang pagpangandam sa General Luna alang sa pag-host sa maong internasyonal nga kompetisyon, uban sa dakong pagsalig ug suporta kang John Mark “Marama” Tokong sa iyang pagdala sa ngalan sa Siargao ug sa Pilipinas sa pinakataas nga lebel sa surfing.
