Gipahinumdoman sa Department of Social Welfare and Development (DSWD-10) ang mga ginikanan nga kinahanglan nilang padayon nga mapaatiman sa health center ang ilang mga anak aron mapadayon ang ilang pagdawat sa ayuda ubos sa First 1,000 Days program.
Sumala ni DSWD-10 spokesperson Oliver Inodeo, importante nga regular nga madala sa barangay health workers o City Health Office ang mga bata nga nag-edad og zero hangtod 24 ka bulan alang sa check-up, immunization, ug uban pang serbisyong panglawas.
Matud ni Inodeo, pinaagi sa maong mga rekord, masiguro sa DSWD nga natuman sa mga ginikanan ang ilang responsibilidad sa pag-atiman sa kahimsog sa ilang mga anak. Ang mga benepisyaryo sa programa makadawat og P750 matag bulan alang sa unang 1,000 ka adlaw sa kinabuhi sa bata.
Apan, mahimong maputol ang maong ayuda kon mapamatud-an nga wala gipaubos sa hustong pag-atiman ug wala gipatuman sa mga ginikanan ang mga gikinahanglang health requirements sa ilang anak.
Photo courtesy: DSWD Northern Mindanao/ Facebook
