Gidakop sa kapulisan sa OCPS1 ang usa ka 49-anyos nga lalaki nga giilang si alyas “Bokols” ulitawo, self-employed ug residente sa Ormoc City human giingong nanagmal sa iyang igsoon pinaagi sa paghapak og kahoy sa ulo sa iyang igsoon atol sa ilang mainit nga panaglalis didto sa ilang puloy-anan sa Purok Malbasag, Barangay East, Ormoc City, alas 6:30 ang takna sa buntag niadtong nakalabay nga adlaw.
Sumala sa inisyal nga imbestigasyon, misangpot sa komprontasyon ang panaglalis sa magsoon hangtod nga giingong gihapak sa suspek ang biktima gamit ang kahoy nga miigo sa ulo niini ug maoy hinungdan sa samad nga iyang naangkon.
Gidala sa Ormoc City Police Station 1 (OCPS1) ang biktima ug ang suspek alas 7:20 sa buntag pinaagi ni Patrolman Erwin Barabad alang sa hustong imbestigasyon ug pagproseso sa insidente. Gitambagan usab ang biktima nga magpatambal aron maatiman ang iyang samad, samtang gipahibalo sa suspek ang hinungdan sa iyang pagdakop ug ang iyang mga katungod subay sa konstitusyon sa pinulongang iyang nasabtan.
Sa pagkakaron, giandam na sa OCPS1 ang mga dokumento alang sa pagsang-at sa angay nga kaso batok sa suspek.
