Gipahibalo ni National Bureau of Investigation (NBI) Director Atty. Melvin Matibag ang pagtukod og usa ka task force aron mag-imbestiga sa giingong anomalya nga may kalabutan sa pagdumala sa 2019 Southeast Asian (SEA) Games nga gipahigayon sa Pilipinas.
Matod ni Matibag, ang maong task force maoy motutok sa imbestigasyon, ilabina sa mga pondo nga giingong wala pa mahatagan og husto nga liquidation.
Gibutyag usab sa direktor nga nakadawat na ang NBI og impormasyon ug mga dokumento nga naghatag og basehan aron susihon ang posibleng anomalya sulod sa SEA Games Organizing Committee.
Ang task force gilangkuban sa Financial Investigation Unit ug Special Action Unit sa NBI, uban sa tabang sa Securities and Exchange Commission (SEC) ug Commission on Audit (COA).
Bisan wala pa’y giila nga mga indibidwal base sa mga dokumentong ilang nasusi, giingon ni Matibag nga adunay mga personalidad nga ilang gisusi isip kabahin sa imbestigasyon.
Gipasabot usab niya nga ang pagsugod sa imbestigasyon nahitabo human makadawat ang NBI og mga impormasyon ug dokumento atol sa iyang pagbisita sa National Bureau of Investigation Academy sa Pampanga.
Gipasiugda ni Matibag nga ang maong imbestigasyon walay kalabotan sa iyang relasyon o sa bisan unsang isyu nga naglambigit kang Senador Alan Peter Cayetano.
Photo courtesy: Daily News
