Patay ang usa ka 26-anyos nga Colombian national human kini gipusil sa usa ka ahente sa U.S. Immigration and Customs Enforcement (ICE) atol sa operasyon sa pagpatuman sa deportation order sa lungsod sa Biddeford, Maine, kaniadtong Lunes.
Base sa inisyal nga imbestigasyon sa Attorney General’s Office sa Maine, nagpatuman ang mga ICE agents og operasyon batok sa usa ka tawo nga adunay pinal nga order sa deportation. Apan, sa dihang gisulayan kining dakpon, misulay og ikyas ang suspek pinaagi sa pagpadagan sa iyang sakyanan padulong sa direksyon sa usa sa mga ahente.
Tungod sa giingong hulga sa kaluwasan sa publiko ug sa mga operatiba, mipabuto ang usa ka ICE officer ug naigo ang drayber sa sakyanan. Gidali siya sa mga responder apan namatay usab tungod sa grabeng samad.
Matud pa sa saksi nga si Daniel Boucher, 71-anyos, nakadungog siya og sunod-sunod nga mga buto sa pusil sa wala pa niya makita ang mga ahente, nga nagpagawas sa usa ka tawo gikan sa puti nga sakyanan nga adunay samad ug dugo sa ulo ug nawong.
Samtang, giingon sa usa ka ICE spokesperson nga ilang gisubay ang katapusang nailhang address sa usa ka indibidwal nga adunay deportation order. Sa dihang ilang gipahunong ang sakyanan, misulay kini og ikyas, maong nakapabuto ang usa ka opisyal tungod sa giingong kahadlok sa posibleng peligro sa publiko.
Sa pagkakaron, gipahimutang sa administrative leave ang nahilambigit nga ICE officer subay sa standard protocol sa mga insidente nga adunay police shooting, samtang nagpadayon ang imbestigasyon sa Federal Bureau of Investigation (FBI) ug sa mga awtoridad sa Maine.
Photo Courtesy: ICE
