Nadakpan ang usa ka 18-anyos nga lalaki sa gikasang joint buy-bust operation sa mga operatiba sa Sto. Tomas Municipal Police Station, 2nd Davao Norte Provincial Mobile Force Company (DNPMFC), Regional Mobile Force Battalion 11 (RMFB 11), ug Regional Intelligence Division 11 (RID 11) sa Purok 10-A, Feeder Road 3, Barangay Tibal-og, Sto. Tomas, Davao del Norte alas 7:24 sa gabii niadtong Hulyo 12, 2026.
Sumala pa nga ang maong operasyon, adunay pre-operation clearance gikan sa Philippine Drug Enforcement Agency (PDEA), nga misangpot sa pagkadakop sa suspek nga giilang si alyas “CJ”, 18 anyos, ulitawo, laborer, ug residente sa Purok 4, Barangay Balagunan, Sto. Tomas.
Narekober gikan sa suspek ang usa ka heat-sealed transparent sachet nga adunay gituohang shabu nga maoy gibaligya sa poseur buyer, laing usa pa ka sachet nga adunay gituohang shabu nga iyang gipanag-iya, usa ka tinuod nga P500 nga gigamit isip marked money, usa ka peke nga P1,000 nga gigamit isip boodle money, ug P100 nga kwarta.
Base sa inisyal nga imbestigasyon, ang nakompiska nga gidudahang shabu adunay gibana-banang gibug-aton nga 0.7 ka gramo ug standard drug price nga mokabat sa P4,760.
Kasong paglapas sa Republic Act 9165 kon Comprehensive Dangerous Drugs Act of 2002 ang atubangon sa dinakpan.
Sa pagkakaron, anaa na kini sa kustodiya sa Sto. Tomas Municipal Police Station ug ang tanang ebidensya alang sa hustong disposisyon.
Photo Courtesy: Vecteezy
