Nadakpan sa kapulisan ang usa ka 30-anyos nga lalaki human makuhaan og duha ka pakete sa gituohang shabu, lakip ang usa ka pakete nga napalit sa poseur-buyer atol sa buy-bust operation nga gipahigayon sa RTR Municipal Police Station sa Purok 4, Barangay Basilisa, lungsod sa RTR, Agusan del Norte.
Sa impormasyon sa Agusan del Norte Police Provincial Office, naila ang nadakpan nga suspek nga si Arthur Agbong, 30-anyos, residente sa Purok 13, Barangay San Vicente, Butuan City.
Gawas sa duha ka pakete sa gituohang shabu, narekober usab sa kapulisan ang P1,000 nga buy-bust marked money nga gigamit sa operasyon.
Ang mga narekober nga ebidensya gidala sa kapulisan alang sa laboratory examination, samtang giandam ang kasong paglapas sa Comprehensive Dangerous Drugs Act of 2002 batok sa suspetsado.
