Gikumpirma sa Disaster Management and Relief Ministry nga mikabat na sa 51 ka mga tawo ang namatay tungod sa kusog nga ulan ug pagbaha sa habagatang-sidlakang bahin sa Bangladesh niadtong Domingo, Hulyo 12.
Dugang pa sa ahensya nga gawas sa mga namatay, 39 usab ang nasamdan, samtang kapin sa 38,400 ka mga indibiwal ang anaa na sa mga evacuation center.
Kahibaloan nga gibaha ang mga baryo sa nagkalainlaing bahin sa rehiyon tungod sa kusog nga ulan nga ilang nasinatian. Samtang kadaghanan sa mga namatay gikan sa pagdahili sa yuta ug pagkalumos sa baha sa mga distrito sa Chattogram, Rangamati, Bandarban, ug Moulvibazar.
Kabahin niini, agig tubag sa sitwasyon nga nasinati sa mga katawhan, gipadala sa gobyerno ang Border Guard Bangladesh ngadto sa 11 ka distrito aron motabang sa mga operasyon sa pagluwas ug pagdumala sa baha.
Samtang nagpadayon ang krisis sa baha, gimandoan ni Prime Minister Tarique Rahman ang mga opisyal sa gobyerno nga panalipdan ang kinabuhi ug kabtangan ug siguruhon ang paspas nga paghatod sa mga hinabang ug serbisyong medikal.
Photo Courtesy: The Brew News
