Nakaangkon ug samad dinunggaban sa lawas ang duha ka mga indibidwal human gidunggab sa usa ka suspetsado sa Purok Seaside, Brgy. Badas, Mati City pasado alas 12:00 sa tungang gabii niadtong Hulyo 12, 2026.
Base sa inisyal nga report, ang mga biktima naila nga sila alyas “Harold”, 34-anyos kinsa gi-selosan sa suspek ug alyas “Mayo”, 30-anyos.
Nasayran nga adunay disco nga nahitabo sa maong lugar, ug gipangunahan ni alyas Harold ang maong kalihokan pinaagi sa pagtugtuog ug mga sonata, apan sa wala damha kalit nga miduol ang suspetsado ug gidunggab ang biktima. Samtang misulay usab ug pugong si alyas Mayo, apan gidunggab usab kini sa suspek sa abaga nga bahin.
Tungod niini, nangaangol ang mga biktima ug daling gidala sa balay tambalanan alang sa medikal nga pag-atiman.
Sa kasamtangan padayon pa ang imbestigasyon sa kapulisan aron masikop ang suspek kinsa daling mikalagiw human sa maong kremin.
