Gipahimangnoan sa Land Transportation Office (LTO) ang tanang accredited motorcycle ug motor vehicle dealers nga sundon ang gitakdang panahon sa pagparehistro sa bag-ong mga sakyanan, uban sa pasidaan nga pagasilotan ang mga mapamatud-ang molapas sa mga regulasyon.
Sumala kang LTO Chief Assistant Secretary Markus V. Lacanilao, kinahanglan marehistro ang bag-ong sakyanan sulod sa pito ka adlaw gikan sa petsa sa Sales Invoice, ug sa ika-11 ka adlaw kinahanglan mahatag na sa tag-iya ang Official Receipt (OR), Certificate of Registration (CR), ug plaka. Ang mga dealer nga dili motuman mahimong maatubang og dagkong multa, suspensyon sa accreditation, o kanselasyon ug blacklisting depende sa gidaghanon sa ilang paglapas.
Gipasidan-an usab sa LTO ang mga dealer nga magpasaka og peke o sayop nga stock ug sales reports, tungod kay mahimo silang masuspenso, multahan, ug kanselahon ang ilang accreditation.
Giawhag usab sa ahensya ang publiko nga ireport ang dili makatarunganong paglangan sa pagpagawas sa OR, CR, ug plaka pinaagi sa opisyal nga mga platform sa LTO aron maaksyunan dayon ang ilang reklamo.
Photo Courtesy: Motodeal
