Nagmalampuson ang Tracker Team sa Marihatag Municipal Police Station (MPS) sa ilang gipahigayon nga “Manhunt Charlie” operation nga miresulta sa pagkasikop sa Top 1 Most Wanted Person sa lebel sa lalawigan niadtong gabii sa Hulyo 11, 2026.
Ang nadakpan usa ka 55-anyos nga lalaki, minyo, mag-uuma, ug residente sa Purok Macupa, Barangay Mararag, Marihatag, Surigao del Sur.
Gidakop siya pinaagi sa Warrant of Arrest nga gi-isyu sa Presiding Judge sa Regional Trial Court (RTC), 11th Judicial Region, Lianga, Surigao del Sur, niadtong Hulyo 2, 2026, tungod sa kasong Murder. Walay piyansa nga gitakda alang sa iyang temporaryong kagawasan.
Sa pagkakaron, anaa na sa kustodiya sa Marihatag MPS ang suspek alang sa hustong dokumentasyon ug sa iyang pagturn-over ngadto sa korte nga nagpagawas sa warrant.
Photo courtesy: Marihatag MPS
