Gipadayag ni National Security Adviser Secretary Eduardo Oban Jr. ang iyang kabalaka sa bag-ong pahayag sa pipila ka Chinese scholars nga nag-angkon nga kabahin sa teritoryo sa China ang Batanes.
Matod ni Oban, walay pagduhaduha nga ang Batanes kabahin sa Republika sa Pilipinas, ug kinahanglan nga seryosohon ang maong isyu ilabina nga gisaulog ang ika-10 anibersaryo sa 2016 Arbitral Ruling.
Gipasabot sa kalihim nga ang maong arbitral ruling dili lamang kadaugan sa legal nga argumento sa Pilipinas, kondili usa usab ka pagpanalipod sa soberanya, katawhang Pilipino, ug kaugmaon sa nasud.
Gidugang niya nga ang arbitral award nagpamatuod nga walay lig-ong basihanan ang mga pag-angkon sa China sa West Philippine Sea, ug dili tugotan sa gobyerno ang pagpakaylap sa giingong “manufactured history” aron kuwestiyunon ang mga teritoryong klarong sakop sa Pilipinas.
Gipasiugda ni Oban nga ang Batanes sakop sa Pilipinas ug magpabilin nga kabahin sa Republika sa Pilipinas.
Photo Courtesy:Lakbay Pinas
