Usa ka 4D roller coaster sa China nga gitawag og “Dinoconda” ang nakahakot karon og dakong atensyon ug gikonsiderar sa daghang coaster enthusiasts nga usa sa labing makahahadlok ug kulbahinam nga rides sa tibuok kalibutan.
Ang maong ride nahimutang sa China Dinosaurs Park sa Changzhou, Jiangsu Province, China, ug nailhan kini sa paghatag og talagsaon ug dili basta-basta nga kasinatian sa mga mosakay. Lahi sa mga naandan nga roller coaster, ang Dinoconda adunay mga lingkuranan nga nagtuyok nga independente sa dagan sa track.
Tungod niini nga disenyo, lisod matag-an sa mga pasahero kung asa nga direksyon sila padulong, hinungdan nga magkalahi ug unpredictable ang kasinatian sa matag higayon nga mosakay ang usa ka tawo. Ang Dinoconda giablihan niadtong 2012 human kini gidisenyo ni Alan Schilke ug gitukod sa sikat nga kompanya nga S&S Worldwide.
Kini adunay gitas-on nga 3,500 ka piye nga track, makadagan sa gikusgon nga hangtod sa 78 kilometro matag oras ug mopaambit og kusog nga hangtod sa lima ka G-forces ug daghang zero-G rolls.
Bisan pa man sa kakuyaw niini, nagpabilin kini nga usa sa mga nag-unang atraksyon sa theme park. Matud pa sa mga nakasulay na sa maong ride, bisan pa ang mga eksperto ug naanad na og sakay sa mga roller coaster niangkon nga lahi ra gyud ang kakulba ug kalipay nga hatod sa Dinoconda.
Photo Courtesy:vice
