Misaka og 21 porsyento ang kantidad sa mga puhunan nga giaprubahan sa Board of Investments (BOI) sa unang tunga sa tuig sa 2026, diin mitala kini og P461.84 bilyon kumpara sa P382.24 bilyon sa parehong panahon sa miaging tuig.
Matud ni Trade Secretary ug BOI Chairman Cristina Roque, ang maong kalamposan nagpakita sa dakong pagsalig sa mga lokal ug langyaw nga investors sa ekonomiya sa nasud ug sa mga reporma sa administrasyong Marcos Jr. aron mapahapsay ang pagnegosyo sa Pilipinas.
Ang maong kantidad naglangkob sa 124 ka mga proyekto nga gilaumang makamugna og 14,415 ka direktang mga trabaho para sa mga Pilipino. Ang kinabakohan sa mga puhunan gikan sa mga lokal nga kompanya nga mikabat og P447.32 bilyon, samtang ang langyaw nga puhunan o foreign investments mitala og P14.16 bilyon, diin ang nasud sa Singapore ang nag-unang tinubdan (P3.15 bilyon), gisundan sa China, United States, Australia, ug Japan.
Kon basehan ang mga sektor, ang industriya sa enerhiya, ilabi na ang renewable energy, ang nakakuha sa labing dako nga bahin nga mikabat og P343.47 bilyon o 74.25 porsyento sa kinatibuk-ang investments. Ang uban pang mga sektor nga miamot og dako mao ang real estate (P36.55 bilyon), transportasyon sa hangin ug dagat (P36.25 bilyon), pagmina (P14.64 bilyon), turismo ug hotel (P7.58 bilyon), ug manufacturing (P7.22 bilyon)
Photo Courtesy: Board of Investments
