Mopatuman na og mas hugot nga lakang ang City Social Welfare and Development Department (CSWD) sa Cagayan de Oro batok sa mga ginikanang mapamatud-ang nagpasagad sa ilang mga anak nga anaa sa kadalanan.
Matod ni Khawa Pana sa Oro Processing Section sa CSWD, hatagan gihapon og higayon ang mga ginikanan nga mausab, apan kung padayon ang ilang pagpasagad, ipatuman na ang mga probisyon sa balaod ug sa mga ordinansa sa syudad.
Gipasabot ni Pana nga kaniadto adunay nagkadaiyang programa ug mga kalihokan nga gihimo alang sa mga kabataan, apan nagbalik-balik gihapon ang problema sa mga batang makita sa kadalanan disoras sa gabie.
Busa, gamiton na sa CSWD ang mga nagtunhay nga balaod aron mapahinumduman ang mga ginikanan sa ilang responsibilidad sa pag-atiman ug pagpanalipod sa ilang mga anak.
Dugang pa niya, hatagan og “ngipon” ang pagpatuman sa ordinansa pinaagi sa pag-imposar og angayng silot o penalty batok sa mga ginikanang mapamatud-ang nagpabaya sa ilang mga anak.
Photo courtesy: Oro Response and Processing Center Information
