Giablihan sa kagamhanan sa Probinsiya sa Sugbo niadtong Oktubre 26, ang Pasilongan Center aron adunay kapahulayan ang mga pamilya ug kauban sa mga pasyente sa Vicente Sotto Memorial Medical Center (VSMMC).
Nahimutang sa Don Mariano Street, duol sa Larsian sa Dakbayan sa Sugbo, ang temporaryong kapuy-an nga adunay mga katre ug tulganan alang sa mga nagbantay sa ilang mga minahal nga nagpatambal sa ospital.
Gipangulohan ni Gov. Pamela Baricuatro ang maong inisyatiba human sa mga taho nga adunay mga paryente ug kauban sa pasyente nga matulog sa gawas sa ospital tungod sa pagpatuman sa polisiya sa VSMMC nga “One Watcher Per Patient.”
Matod ni Baricuatro, gitukod ang sentro aron adunay gitakdang kapahulayan ang mga kauban sa pasyente nga walay laing kapuy-an samtang nagpaayo o nagpatambal ang ilang mga minahal.
Nagsugod sa pagdawat og mga kauban sa pasyente ang Pasilongan Center kagahapong adlawa, Oktubre 27. Mitambong usab sa pagbukas niini si VSMMC Medical Center Chief II Dr. Gerardo M. Aquino Jr. ug ang iyang grupo, Provincial Administrator Atty. Ace Durano, Capitol Piso Health Consultant Dr. Nikki Baricuatro Catalan-Vizcayno, ug ubang mga hepe sa departamento sa kapitolyo.
Photo Courtesy: CDN Digital
