Patay ang usa ka 95-anyos nga bedridden nga ginang human napaig sa sunog nga miigo sa ilang panimalay sa Purok Caymito, Barangay Cogon East, lungsod sa Carmen. Giila ang biktima sa alyas Sila, nga didto sa ikaduhang andana sa ilang balay sa dihang misilaob ang kalayo.
Sumala sa Carmen Fire Station, ang katabang sa ginang didto sa kusina sa ubos sa pagsugod sa sunog. Misulay ang katabang sa pagluwas sa biktima pinaagi sa paggamit og basang habol, apan napakyas kini tungod sa kakusog sa kalayo. Mitabang usab ang anak sa ginang nga nagpuyo sa kasikbit nga balay, apan wala na maluwas ang biktima.
Gibanabanang mikabat sa ₱300,000 ang kadaot sa sunog. Padayon pang giimbestigahan sa mga bombero ang hinungdan ug gigikanan sa maong insidente.
